MP Elections : भाजपने जाहीर केलेल्या उमेदवारांच्या यादीमुळे अनेक ठिकाणी वाद निर्माण झाला आहे. ग्वाल्हेरमध्ये भाजप आणि ज्योतिरादित्य सिंधिया या दोघांचे समर्थक माजी मंत्री माया सिंह यांना तिकीट देण्यास विरोध करत आहेत. मुन्नालाल गोयल यांचे तिकीट रद्द केल्याने सिंधिया समर्थक संतप्त झाले असून जयविलास पॅलेसला घेराव करून आंदोलन करत आहेत. दरम्यान,सिंधिया(Jyotiraditya Scindia) आंदोलकांचे मन वळवण्याचे प्रयत्न सुरू आहेत.
ग्वाल्हेर पूर्व भागातील माजी आमदार मुन्नालाल गोयल हे भारतीय जनता पक्षाचे प्रबळ दावेदार होते. गोयल हे 2018 मध्ये काँग्रेसच्या तिकिटावर विजयी झाले होते, परंतु ज्योतिरादित्य सिंधिया (Jyotiraditya Scindia)यांनी कमलनाथ सरकारविरोधात बंड करून सरकार पाडले तेव्हा मुन्नालाल गोयल यांचाही राजीनामा देणाऱ्या आमदारांमध्ये होता.
2020 मध्ये झालेल्या पोटनिवडणुकीत गोयल यांनी भाजपकडून निवडणूक लढवली होती. त्याच भागातून तिकीट पण काँग्रेसचे सतीश सिकरवार यांच्याकडून पराभूत झाले. मात्र, असे असतानाही त्यांना राज्य बियाणे व शेती विकास महामंडळाचे अध्यक्ष बनवून कॅबिनेट मंत्रीपदाचा दर्जाही देण्यात आला.
पोटनिवडणुकीतील पराभवानंतरही, गोयल आणि त्यांचे समर्थक या भागात सतत सक्रिय होते आणि त्यांनी त्यांच्या विधानसभा मतदारसंघात सरकारने आयोजित केलेल्या उद्घाटन, पायाभरणी आणि पक्ष संघटना कार्यक्रमातही महत्त्वाची भूमिका बजावली. यावेळीही गोयल यांनाच तिकीट मिळेल, अशी खात्री त्यांच्या समर्थकांना होती, मात्र काल रात्री आलेल्या यादीत त्यांच्या जागी माया सिंह यांना तिकीट देण्याची घोषणा झाल्यानंतर त्यांच्या समर्थकांनी संतप्त होऊन नाकाबंदी केली आणि आज सकाळी त्यांनी मोर्चा काढला. जय विलास पॅलेस बाहेर आंदोलन करून गोंधळ घालत आहेत.