नवी दिल्ली – जम्मू-काश्मीरमध्ये दहशतवादी कारवाया वाढवण्याच्या पाकिस्तानच्या प्रयत्नांना हाणून पाडण्याच्या दिशेने एक मोठे पाऊल म्हणून, भारतीय लष्कर ‘ऑपरेशन सर्वशक्ती’ सुरू करत आहे. यामध्ये सुरक्षा दल पीर पंजाल पर्वतरांगांच्या दोन्ही बाजूंनी कार्यरत असलेल्या दहशतवाद्यांना लक्ष्य करणार आहेत.
अलीकडच्या काळात, पाकिस्तान-पुरस्कृत दहशतवादी गटांनी दक्षिण पीर पंजाल पर्वतरांगांमध्ये विशेषतः राजौरी पुंछ सेक्टरमध्ये दहशतवाद पुनरुज्जीवित करण्याचा प्रयत्न केला आहे. इथे दहशतवाद्यांनी केलेल्या हल्ल्यात सुमारे २० जवान शहीद झाले आहेत. डेरा की गली भागात झालेल्या कारवाईत २१ डिसेंबर रोजी चार सैनिक मारले गेले.
“ऑपरेशन सर्वशक्ती’ पीर पंजाल पर्वतरांगांच्या दोन्ही बाजूंनी एकत्रितपणे दहशतवादविरोधी कारवाया केल्या जातील जेथे नगरोटा-मुख्यालय असलेल्या व्हाईट नाईट कॉर्प्ससह श्रीनगर-आधारित चिनार कॉर्प्स एकाचवेळी ऑपरेशन्स करत असतील, असे लष्कराच्या सूत्रांनी सांगितले.
ऑपरेशन सर्पविनाशच्या धर्तीवर हे ऑपरेशन अपेक्षित आहे, जे २००३ मध्ये पीर पंजाल रेंजच्या दक्षिणेकडील भागात दहशतवाद्यांचा खात्मा करण्यासाठी सुरू करण्यात आले होते. लष्करप्रमुख जनरल मनोज पांडे यांनी अलीकडेच सांगितले की २००३ पासून या भागात दहशतवादी कारवाया जवळजवळ नाहीशा झाल्या होत्या, परंतु पाकिस्तान आता तेथे दहशतवाद पुनरुज्जीवित करण्याचा प्रयत्न करत आहे.