Paytm Payments Bank: पेटीएम पेमेंट्स बँकेविरुद्ध चालू असलेल्या तपासात अंमलबजावणी संचालनालयाला (ईडी) अद्याप परकीय चलनाच्या संभाव्य उल्लंघनाचे कोणतेही प्रकरण आढळले नाही. वृत्तसंस्था रॉयटर्सने सूत्रांच्या हवाल्याने 19 फेब्रुवारी रोजी दिलेल्या वृत्तात ही माहिती दिली.
अंमलबजावणी संचालनालयाने गेल्या आठवड्यात One97 कम्युनिकेशन्सचे (One97 Communications) युनिट पेटीएम पेमेंट्स बँकेच्या परदेशातील व्यवहारांची चौकशी करण्याची घोषणा केली होती. 31 जानेवारी रोजी, भारतीय रिझर्व्ह बँक (RBI) ने पेटीएम पेमेंट्स बँकेला त्यांच्या खात्यांमध्ये किंवा वॉलेटमध्ये नवीन निधी स्वीकारण्यास बंदी घातली आहे.
या कारवाईनंतर पेटीएमचे शेअर्स 50 टक्क्यांहून अधिक घसरले आहेत. ही घसरण इतकी प्रचंड होती की त्यामुळे कंपनीच्या भागधारकांची संपत्ती सुमारे $3.1 बिलियनने कमी झाली. अहवालातील सूत्रांनी सांगितले की, तपासात ‘नो युवर कस्टमर (KYC) नियमांशी संबंधित काही त्रुटी आढळल्या आहेत ज्या वापरकर्त्यांच्या प्रोफाइलची पडताळणी करण्याशी संबंधित आहेत.
सूत्राने सांगितले की, अंमलबजावणी संचालनालयाला पेटीएम पेमेंट बँकेत परकीय चलन व्यवस्थापन कायद्याचे कोणतेही उल्लंघन आढळले नाही. बँकेने संशयास्पद व्यवहाराची तक्रार न केल्याचीही एक समस्या होती, असे सूत्राने सांगितले. सूत्रांनी सांगितले की अंमलबजावणी संचालनालय अद्याप कोणत्याही संभाव्य उल्लंघनासाठी आरोप लावायचा की नाही याचा शोध घेत आहे.
अंमलबजावणी संचालनालयाकडून या प्रकरणावर कोणतीही प्रतिक्रिया आली नाही. पेटीएमने म्हटले आहे की ते अंमलबजावणी संचालनालय आणि इतर प्राधिकरणांना माहिती देत आहे.
दरम्यान, सोमवारी, पेटीएमच्या शेअर्समध्ये सलग दुसऱ्या दिवशी 5 टक्क्यांची वाढ झाली आणि दोन दिवसांत कंपनीच्या शेअर्समध्ये एकूण नफा 10 टक्क्यांहून थोडा जास्त झाला. एक्सचेंजने पेटीएम शेअर्ससाठी 5 टक्के अप्पर आणि लोअर सर्किट मर्यादा सेट केली आहे.
RBI ने पेटीएम पेमेंट्स बँकेच्या बाबतीत गेल्या आठवड्यात वारंवार विचारले जाणारे प्रश्न (FAQ) जारी केले होते. यामध्ये पेटीएमच्या सेवांबाबत अनेक गोष्टी स्पष्ट करण्याचा प्रयत्न करण्यात आला. मध्यवर्ती बँकेने पेटीएम पेमेंट्स बँकेला 15 मार्चपर्यंत व्यवहार संपवण्याची अंतिम मुदत वाढवली आहे.
याशिवाय पेटीएम पेमेंट्स बँकेत जमा केलेल्या विद्यमान ग्राहक आणि ठेवीदारांना त्यांचे पैसे इतर बँकांमध्ये हस्तांतरित करावे लागतील, असे आरबीआयने म्हटले आहे. ज्या ग्राहकांचे शिल्लक (पैसे) PPBL वॉलेट आणि Fastag मध्ये आहेत ते ते वापरू शकतात. मात्र 15 मार्चनंतर ते त्यात नवीन पैसे टाकू शकणार नाहीत.