Rule Change From 1 May : उद्यापासून मे महिना (May 2024) सुरू होणार आहे. प्रत्येक महिन्याच्या पहिल्या तारखेला देशात अनेक बदल होतात. त्यामुळे 1 मे 2024 पासून बरेच बदल होणार आहेत (Rule Change From 1st May), जे थेट तुमच्या खिशावर परिणाम करु शकतात. यामध्ये एलपीजी सिलिंडरच्या किंमतीपासून ते क्रेडिट कार्डद्वारे बिल पेमेंटपर्यंत सर्व गोष्टींचा समावेश आहे. याचा अर्थ उद्यापासून लागू होणारे हे बदल तुमच्या स्वयंपाकघरापासून ते खरेदीपर्यंत सर्व गोष्टींवर परिणाम करू शकतात. अशाच 5 मोठ्या बदलांबद्दल जाणून घेऊया…
पहिला बदल- LPG च्या किमती –
1 एप्रिल रोजी, देशात चालू असलेल्या लोकसभा निवडणुकीच्या (Loksabha Election 2024) आधी, तेल विपणन कंपन्यांनी एलपीजी सिलिंडरच्या किमतीत बदल केला होता आणि 19 किलोच्या व्यावसायिक गॅस सिलिंडरची किंमत 32 रुपयांनी कमी केली होती. मात्र, अनेक दिवसांपासून घरगुती गॅस सिलिंडरच्या दरात कोणताही बदल झालेला नाही, आता 1 मे रोजी एलपीजी सिलिंडरच्या किमतीत दिलासा मिळण्याची अपेक्षा सर्वसामान्यांना आहे. याशिवाय पीएनजी, सीएनजी आणि एटीएफच्या किमतीतही बदल दिसून येऊ शकतात.
दुसरा बदल- ICICI बचत खाते शुल्क –
ICICI बँकेने ग्राहकांच्या बचत खात्यावरील शुल्कात बदल केला आहे. तो 1 मे 2024 पासून लागू होणार आहे. या अंतर्गत डेबिट कार्डवरील वार्षिक शुल्क 200 रुपये करण्यात आले आहे, तर ग्रामीण भागात ते 99 रुपये निश्चित करण्यात आले आहे. याशिवाय बँकेने चेकबुकच्या नियमातही बदल केले असून 1 मे नंतर 25 पानांचे चेकबुक देण्यासाठी कोणतेही शुल्क आकारले जाणार नसून, त्यानंतर प्रत्येक पानासाठी 4 रुपये शुल्क आकारण्यात येणार आहे. एवढेच नाही तर IMPS व्यवहारांवर 2.50 ते 15 रुपये शुल्क आकारले जाईल.
तिसरा बदल- येस बँकेत अनेक नियम बदलले –
येस बँकेने 1 मे 2024 पासून बचत खात्यांवरील किमान सरासरी शिल्लक शुल्क बदलले आहे. या अंतर्गत, बचत खात्याचा प्रो मॅक्स MAB 50,000 रुपये असेल, ज्यावर जास्तीत जास्त 1,000 रुपये शुल्क आकारले जाईल. सेव्हिंग अकाउंट प्रो प्लस, येस एसेन्स एसए आणि येस रिस्पेक्ट एसए मधील किमान शिल्लक 25,000 रुपये असेल आणि या खात्यावर 750 रुपये शुल्क निश्चित करण्यात आले आहे. बचत खाते प्रो मध्ये किमान 10,000 रुपये शिल्लक ठेवावे लागतील आणि त्याचे शुल्क देखील कमाल 750 रुपये असेल. बचत मूल्यासाठी 5000 रुपयांची मर्यादा आहे आणि कमाल 500 रुपये शुल्क आकारले जाईल. नियमाचे उल्लंघन केल्यास दंड शुल्क आकारले जाईल.
चौथा बदल- बिल भरणे महाग होईल –
चौथा बदल क्रेडिट कार्ड वापरकर्त्यांशी संबंधित आहे, विशेषत: जे युटिलिटी बिल पेमेंटसाठी हे कार्ड वापरतात, त्यांच्यावरील बोजा वाढणार आहे. 1 मे पासून, येस बँक क्रेडिट कार्डवर 15,000 रुपयांपेक्षा जास्त वीज किंवा इतर युटिलिटी बिल पेमेंटवर 1% अतिरिक्त शुल्क लागू केले जाणार आहे, तर IDFC फर्स्ट बँक क्रेडिट कार्डवरुन 20000 रुपयांपेक्षा जास्त बिल पेमेंटवर 1 % अतिरिक्त शुल्क आणि 18 % जीएसटी आकारला जाईल.
पाचवा बदल- बँक 14 दिवस बंद –
मे 2024 मध्ये बँकांना बंपर सुट्ट्या आहेत. संपूर्ण महिन्यात एकूण 14 दिवस बँकांमध्ये कोणतेही काम होणार नाही. बँकेला सुट्टी असेल. रिझर्व्ह बँक ऑफ इंडिया (RBI) च्या बँक सुट्टीच्या यादीनुसार, मे महिन्यात येणाऱ्या या सुट्ट्यांमध्ये अक्षय्य तृतीया, महाराष्ट्र दिन, रवींद्रनाथ टागोर जयंती आणि इतर सुट्ट्यांचा समावेश आहे. अशा परिस्थितीत, बँकिंग कामासाठी घर सोडण्यापूर्वी, कृपया ही यादी एकदा पहा. दुसऱ्या आणि चौथ्या शनिवार व्यतिरिक्त या सुट्यांमध्ये रविवारच्या साप्ताहिक सुट्टीचाही समावेश आहे.