मुंबई – प्रसिद्ध सिनेमॅटोग्राफर आणि दिग्दर्शक महेश लिमये यांच्या बहुचर्चित ‘जग्गू आणि ज्युलिएट’ या चित्रपटाचा टीजर नुकताच प्रदर्शित झाला. चित्रपटाचे पोस्टर रिलीज झाल्यापासून या चित्रपटाच्या टीजरची प्रतीक्षा चाहत्यांना होती. टीजरमध्ये अमेय वाघ एका आगरी कोळी तरुणाच्या भूमिकेत तर वैदेही विदेशातून आलेल्या तरुणीच्या भूमिकेत दिसत आहे. टीजरमध्ये दोघांची मजेदार केमेस्ट्री पाहायला मिळत आहे.
‘जग्गू आणि जुलिएट’ नावावरूनच हा चित्रपट काहीतरी हटके घेऊन येणार हे निश्चित झालं होत.त्यात ‘तवाफ्राय प्रेमाची रवाफ्राय लव्हस्टोरी’ या टॅगलाईनमुळे उत्कंठा आणखी वाढली होती. देवभूमी अर्थात उत्तराखंड येथून ही लव्हस्टोरी सुरु होत असल्याचे टीजरवरून समजते. अमेय वाघचे आगरी स्टाईल भन्नाट डायलॉग आणि त्याला अजय अतुलच्या तुफान म्यूजिकची साथ यामुळे हा टीजर प्रेक्षकांच्या चांगलाच पसंतीस पडत आहे.
पुनीत बालन स्टुडिओजने चित्रपटाची निर्मिती केली असून अमेय वाघ आणि वैदेही परशुरामी व्यतिरिक्त उपेंद्र लिमये आणि जयवंत वाडकर असे दिग्गज चेहरे देखील असणार आहेत.अमेय-वैदेही ही जोडी झोंबिवली या चित्रपटनानंतर पुन्हा एकदा एकत्र दिसणार आहे. २००८ मध्ये ‘यलो’ या चित्रपटाद्वारे सामाजिक भान असलेला विषय हाताळणारे महेश लिमये यांनी या चित्रपटाचे दिग्दर्शन केले आहे. त्यासोबतच चित्रपटात अजय अतुलचं जबरदस्त म्युजिक ऐकायला मिळणार आहे. येत्या १० फेब्रुवारीला हा चित्रपट सिनेमागृहात प्रदर्शित होणार आहे.